الفصل الاول : اصبحنا واصبح الملك لله
كالعادة صحيت الصبح على صوت منبه كأنه
بيفكرني اعيد يومي , ويصعب عليا منظر السرير وانا ببعد عنه ورايح اقعد على الكرسي , والكرسي يا ساده يا كرام ليه
ثلاث فوائد اساسيه بتبدأ بالتعود على البرد وتانيها افتكر الاحلام واحلل معانيها
واخيرا عشان الكرسي بيكون دفي وبيفكرني بسريري العزيز وممكن بردو انام عليه خمسه ,
وننتقل للمرحلة الاصعب الا وهي الحمام وغسيل الوش بميه سقعه مرصرصه , أخرج كأني
انسان جديد وادور على فطار مش عشان افطر بس اهو وقت بيضيع قبل ما انتقل للهم
الاكبر , افتح الدولاب واحاول اوفق بين اي حاجتين ويا ريته بفايده , لما البنطلون
يكون مغسول القيمص تلاقيه متكسر وخد من دا كتير , مواقف كأنها بتتكرر عشان ترخم
عليك بس عشان ترخم عليك, المهم البس وانقل
الحاجات المهمة من هدوم امبارح لهدوم النهارده وهي كالتالي .. الكارنيه عشان لو
حرس الجامعه حب يتأكد اني مش ارهابي واني طالب عادي والكارت الاصفر بتاع التربيه
العسكريه و جواز السفر لأن البطاقه مقطومه وبصراحه الصوره فيها تخليك تسخسخ من
الضحك , حاجة كدا تقطع الخميره من البيت .
ألمع الجزمة مع اني عارف انها هاتتوسخ بعد
اول متين تمانيه وتامنين خطوه (288 step) ودا يا دام
عزكم عدد الخطوات بتاعتي من البيت لوسيلة المواصله ولكم ان تتخيلوا بتتضاعف كام
مره في الشتا بعد ظهر المستنقعات المائيه اللي بتختلط مع مياه المجاري عشان تطلع
ريحه تقفل يومك من اوله .
المهم انزل من البيت متفائل بيوم جديد واشم
الهوا الجميل وارمي السلام على الماره ومحدش بيرد كالعادة الا من رحم ربي , الكل
ماشي بيفكر والفضول يجزبني اني ادخل جوا راسهم واشوفهم بيفكرو في ايه , وممكن يكون
كدا .. اول واحد "يا رب الاقي طابور العيش قصير عشان اروح بسرعه "
والتاني "يا ترى حد مضالي حضور ولا هتاخد غياب" ويا سلام لو في ست هاتبقى "افتكري يا
عنيات ربع كيلو ملوخيه ونص رز و اخد التموين قبل ما الشهر يخلص , ربع كيلو
ملوخيه ونص رز ..." وهكذا ..
المهم نرجع لليوم تاني , اقف في البرد مستني
ميكروباس للجامعه والحمد لله الصبح على
الساعه سبعه بيكون فاضي وكالعادة لما تشاور له لازم يقف قدامك بمترين كأنه بيقول
"هيهيهيهه خليته يجري ورايا تاني الاهبل" , وبدوري برخم عليه وبتقصع في
المشي لحد ما اركب لأني عارف انه فاضي ومحتاجني اركب , وي كأنها قواعد الحرب
البارده بيني وبين السواقين ودي يا ساده يا كرام اسمها "Rules of the game between me and the drivers"
اطلع الميكروباس فالكمسري ينده بجملته
المعروفه "الاجره يا حضرات" فأمد ايدي بالنص جنيه واستنه سؤاله الغبي
المعتاد "واحد يا باشا ؟" هه؟! *-* .. قال يعني النص جنيه ممكن يركب
اتنين , وصلنا الجامعه والحمد لله وبالخطوه السريعه بروح لمكان تجمع طلاب التربيه
العسكريه , والقاعده هناك قبل الطابور متعه , بنقف في البرد مجموعات نتكلم في اي
حاجة والحديث بيتعمق والقاعده بتحلو وبتبقى زي اي قاعده للمصرين بصفات اساسيه ,
مثلا الواحد لازم يبدأ كلامه بـ "تعرف" ويكمل , القاعدة التانيه "المصري
الاصلي لازم يفتي في كل حاجة" واخيرا القاعده الثالثه الا وهي ان واحد لازم
يقطع كلامك بنكته نغشه زيه J .. "what
can I do , it's my live it's my F live" .
وفجأه ييجي كابتن زكي ودا يا دام عزكم احد
العساكر التلاته بتوع التربيه العسكريه , وهو طويل القامه غليظ الطباع غير قابل
للضحك L , نقف في الطابور
وناخدلنا كلمتين في جنابنا من زكي ويأتي امر عسكري بالإرتكاز يعني اقعد على
ارافيصك زي البطه ويليه امر بالإنتباه - بنقف تاني- بنبدأ الطابور وصفه وانتباه وسلامات
وحذا وحاجات كدا عسكريه يقال انها من الدرجة سريه وزي ما مش قولتلكم فوق ان الموبيلات كمان ممنوعه ,
وبالرغم من غلاسة الطابور الا انه لا يخلي من المواقف الكوميديه , يعني مثلا
العسكري يقول لليمين حذا – يعني نبص ناحية اليمين ونوحد الصف- تلاقي شويه حلوين
يبصولك شمال , اتفضل يا سيدي راجل في الجامعه ومايعرفش اليمين من الشمال (عيال
ضاربه) .
إنتظروني في الفصل التاني soOoOon
ليست هناك تعليقات:
إرسال تعليق